2Cor 9 | BJR | STEP | Ánutuna ufa írimariasa Yudeea máqannaasa munnimma nímirara qianára ínnee dóo írimariafanoo qinée fífau ákara rúmannimaqeeqa.

2 Corinthians 9

Pauroofa Koorinti máqannaara nárana máreefandinna munnimmana suqúaqee qímaqoofa máridanoo.

1 Ánutuna ufa írimariasa Yudeea máqannaasa munnimma nímirara qianára ínnee dóo írimariafanoo qinée fífau ákara rúmannimaqeeqa. 2 Ínnee eedóo qímasee dadaaqímariasa máriafaqa qinée íridaqa, qinée ínni nimooqímasee Maseedoonia máqannaasa qímannimiqa. Qinée ínniara maaqí qímasee qímannimiqa, Kirisa máqa maaqaki maríasa Koorinti máqusanaasa misá náaree máa̱ eendá áiqarái aukuana eedóo qímasee deedaqiqau. Qinée miqí qímasee Maseedoonia máqannaasa ínni Koorinti máqannaasara qímannimiafanaqa dóo misá faqa mi-ufána irisée maasá faqa dadaaqíraree qímasee fíndifia akaqá maqannaasa kai sía fíndi fia. 3 Qinée ínniara ufa qíafannana fífau ufá kai qianóora qeeqá qíkaqaafasaauqa maréeqee ínniki quqéeqa misá óonuree ínni munnimma suqú moodáaqoo quqáaqeera qiní ufa ánoonaikianifeera ínniki quqáaqee qídaqa.

4 Qinée faqa Maseedoonia máqannaa akaqáusa qiní faqa ínni Koorinti máqusai óoquraifaqa sía deedaqíranaki maasá óoquraana ínnee nisaurífaqa maasá faqa Maseedoonia máqannaasa qiní faqa óoqu fifándinausa nisaurífoora qinée ínniara qifaaqa quqásee ínniara ufa qíqa. 5 Qinée minára iriséeqa qeeqá qíkaqaafasaauqa niqiqámasaunaqa indaarú óoqureeqa ínni nímifandinna munnimmara deedaqamándaifaqa qinée ínaaqianna óoquraanaqa ínnee ínneeqa íriranannái kai nímira óosana koorooiaqa sía qinée qímannimiana nímiaqa ínniqa nídirafa kai qínaqa káqi nímiaqa. Óoqeenáa írirafa maaqímminoo máridanoo.

6 Moodáa asumu úmmaqimarifa moodáa kai aiqúannoo moómoo úmmaqimarifa moómoo aiqúannoo. Qinée Pauroosa minásaaqari ínni dadaaqíra oosanara maaqí qídaqa. 7 Ínnee minára irisée ínneeqa íriranannái kai munnimma áquaqa, sía miná áqusee ufaqírafa máriani sía moonára daakápaifaqa áqi fee qía Ánutufa asasammándee áqimari fasiqanara áididanoo minára asasammásee áquaqa. 8 Ínniqa nimana kái nárana máraaqee munnimma Ánutufa amaná nímiannoo sía ínni munnimma amana káifau nímmiannoo aabaa faqa níminaqa minánnai nána ainainaree dadaaqírafa kambíqaannoo fee ínnee faqa amaná minánnai dadaaqiaqa. 9 Óoqai tamummáqara fasiqauqa minára maaqí qímasee ákara rúmaqoofa máridanoo.

Ámiqira fasiqauqaindi kudi fasiqauqa áfaaridaqa nímidaqa.
Misá ámiqi ámiqirafa sía taikáannoo náaru náaru máriannoo.
10 Ánutufa ínni Koorinti máqannaa faqa dadaaqámmiannoo. Mifá asumu faqa néemaria nárana faqa nímimarifa máridanoo ínni nimana asumu ínni nimisáinaqa úmmaqusaifanoo Ánutufa kambíqarana nímiannoo ínnee áfaaramandee moo máqannaa nárana dadaaqífanoo ínnee kafáa kafáa miqíaqee qímasee ínni Ánutufa irairaaírana nímiannoo. 11 Ánutufa maqee maqee nárana aináina moómoo níminaqa ínnee miná qáfeeqa amaná maqee maqee akaqáusa dadaaqiaqa. Ínnee maasásaaqari dadaaqímaria maqannaasa ínni dadaaqíranara quándaki Ánutunara dúfi dúfi firaaqóo qifaranoo.

12 Ínni dadaaqíra saika fannoo sía Ánutuna ufara suqímariasa kai dadaaqídanoo Ánutunara dúfi dúfi qírana faqa óondainni námmariara foora áqufidanoo. 13 Ínni dadaaqíra aináinirafa ínnee Ánutuna ufamau fírana kooroo íannoo. Moómoosa miná qáfammasee Ánutuna amooqifáranoo misá ínni áfaaramasee náida nímirana qáfammasee kafáa ínnee ásauku mundírana fasáasa ufasáa atooqáfi mundíqa márinnana faqa qáfammasee sía ufá kai qímasee ánoonee qímasee Ánutuna amooqifaranoo. 14 Ínnee dadaaqímariasa ínniara nídimarinaqa ínni ámiqi ámiqiranara innaaru qifáranoo. Ánutufa moókira áfaarirana ínni nímunara Ánutufinnai ínniara nídimarinaqa ínni ámiqi ámiqiranara innaaru qifáranoo. 15 Ánutufa narí áfaarinoo maasá qímunara miná úriqararafa aiqáma ainaina arusée firaafá máridanoo minára maasá aiqámausa dúfi dúfi qímamaqáaqa.